'అనంత'లో టిడిపి నేత నన్నపనేని అరెస్టు

అనంతపురం: అనంతపురంలో తెలుగుదేశం పార్టీ నేత నన్నపనేని రాజకుమారిని బుధవారం పోలీసులు అరెస్టు చేశారు. సమైక్యాంధ్రకు మద్దతుగా ఆందోళన చేస్తున్న శ్రీకృష్ణదేవరాయాంధ్ర విశ్వవిద్యాలయం విద్యార్థులకు సంఘీభావం తెలపడానికి వచ్చిన ఆమెను పోలీసులు అడ్డుకున్నారు. పోలీసులను అడ్డుకునే ప్రయత్నం జరిగింది. ఈ సమయంలో తీవ్ర ఉద్రిక్తత నెలకొంది. ఈ స్థితిలో ఆమెను పోలీసులు అరెస్టు చేశారు.

సమైక్యాంధ్రకు మద్దతుగా తెలుగుదేశం శాసనసభ్యులు చేస్తున్న నిరాహార దీక్షా శిబిరాన్ని నన్నపనేని సందర్శించారు. దీక్షలో కూర్చున్న శాసనసభ్యులు పరిటాల సునీత తదితరులను ఆమె పరామర్శించారు. అఖిలపక్ష కమిటీ ఆధ్వర్యంలో అనంతపురంలో భారీ ర్యాలీ జరిగింది. ఎస్కే విశ్వవిద్యాలయం విద్యార్థులపై జరిగిన లాఠీచార్జికి నిరసనగా విద్యార్థి సంఘాలు, రాజకీయ పార్టీలు జిల్లా బంద్ కు పిలుపునిచ్చాయి. బంద్ లో భాగంగా జిల్లా వ్యాప్తంగా అన్ని పట్టణాల్లో నిరసన ప్రదర్శనలు జరిగాయి.