డిసెంబరు 1 నుంచి డిజిటల్ రూపాయి

దేశంలో డిజిటల్‌ రూపాయి వైపు అడుగులు వడివడిగా పడుతున్నాయి. డిసెంబర్‌ 1 నుంచి రిటైల్‌ డిజిటల్‌ రూపాయిని (e₹-R) పైలట్‌ ప్రాజెక్ట్‌గా ప్రారంభించబోతున్నారు. ఈ విషయాన్ని రిజర్వుబ్యాంకు ఆఫ్ ఇండియా వెల్లడించింది. ఎస్‌బీఐ, ఐసీఐసీఐ బ్యాంక్‌ సహా నాలుగు బ్యాంకులు ఇందులో పాల్గొంటున్నాయి. ఈ డిజిటల్‌ రూపాయికి సంబంధించి నవంబరు 1న పైలట్‌ ప్రాజెక్టుగా టోకు విభాగంలో ప్రవేశపెట్టారు. సెంట్రల్‌ బ్యాంక్‌ డిజిటల్‌ కరెన్సీ (సీబీడీసీ)గా దీన్ని వ్యవహరిస్తారు.

ఎంపిక చేసిన ప్రాంతాల్లో వినియోగదారులు, వ్యాపారులతో కూడిన ఎంపిక చేసిన బృందాల మధ్య ఈ లావాదేవీలు నిర్వహించనున్నారు. ప్రస్తుతం కాగిత, నాణేలు ఉన్న విలువలతోనే డిజిటల్‌ రూపాయినీ జారీ చేయనున్నారు. ఈ మొత్తాన్ని బ్యాంకుల ద్వారా జారీ చేస్తారు. దీన్ని బ్యాంకులు అందించే డిజిటల్‌ వ్యాలెట్‌ సాయంతో లావాదేవీలు నిర్వహించొచ్చని ఆర్బీఐ పేర్కొంది. వ్యక్తులు, వ్యక్తుల మధ్య; వ్యక్తులు-వ్యాపారుల మధ్య ఈ లావాదేవీలు జరపొచ్చని తెలిపింది.

ఇప్పుడు చలామణిలో ఉన్న నగదు పట్ల ఉన్న నమ్మకం, భద్రతనూ రిటైల్‌ డిజిటల్‌ రూపాయికీ తీసుకురానున్నారు. ముందుగా ముంబయి, ఢిల్లీ, భువనేశ్వర్, బెంగళూరు నగరాల్లో ఈ ప్రయోగాలు నిర్వహించనున్నారు. భవిష్యత్తులో మరిన్ని బ్యాంకులు, మరిన్ని ప్రాంతాలకు విస్తరిస్తారు.ప్రస్తుతం ఉన్న కరెన్సీ నోట్లకు ఇది ప్రత్యామ్నాయం కాదు. ప్రస్తుతం ఉన్న నగదు కూడా కొనసాగుతుంది. అదనపు చెల్లింపు అవకాశాలను కల్పించడానికే సీబీడీసీని తీసుకొచ్చినట్లు ఆర్బీఐ స్పష్టం చేసింది.

English summary

In the country, steps towards digital rupee are taking place.