తెలుగుదేశం ఎమ్మెల్యే సీతక్క పాదయాత్రకు బ్రేక్, తోపులాట

By Pratap

Published: Tuesday, February 15, 2011, 14:27 [IST]

వరంగల్: తెలంగాణ కోసం తెలుగుదేశం పార్టీ వరంగల్ జిల్లా ములుగు శానససభ్యురాలు సీతక్క చేపట్టిన పాదయాత్ర మంగళవారం ఉద్రిక్తంగా మారింది. తెలంగాణ కోసం ఆమె మూడు రోజుల పాటు ములుగు నియోజకవర్గంలో పాదయాత్ర తలపెట్టారు. అయితే, ఆమె పాదయాత్రను విద్యార్థులు, తెలంగాణ జెఎసి కార్యకర్తలు అడ్డుకున్నారు. వారిని ఎదుర్కునేందుకు తెలుగుదేశం పార్టీ కార్యకర్తలు సిద్ధపడ్డారు. దీంతో విద్యార్థులకు, తెలుగుదేశం కార్యకర్తలకు మధ్య తోపులాట చేసుకుంది. పరిస్థితి ఉద్రిక్తంగా మారింది.

గట్టమ్మ దేవాలయంలో ప్రార్థనలు చేసిన అనంతరం ముఖ్యమంత్రి కిరణ్ కుమార్ రెడ్డి రచ్చబండను మహిళలు అడ్డుకున్న రాయినిగూడెం గ్రామం నుంచి పాదయాత్రను ప్రారంభించాలని అనుకున్నారు. గట్టమ్మ దేవాలయం వద్దనే విద్యార్థులు అడ్డుకున్నారు. దీంతో ఆమె అక్కడే బైఠాయించారు. ఆదివాసి మహిళ అయిన తనను అవమానిస్తున్నారని ఆమె విమర్శంచారు. తెలంగాణకు అనుకూలంగా తెలుగుదేశం పార్టీ నిర్ణయం వెల్లడించాలని, లేదంటే రాజీనామా చేయాలని, అప్పుడే సీతక్క పాదయాత్రను అనుమతిస్తామని తెలంగాణ జెఎసి నాయకులు చెప్పారు.

Published On February 15, 2011