రజినీ కాంత్

సూపర్ స్టార్ రజినీకాంత్ 1950 డిసెంబర్ 12వ తేదీన అప్పటి మైసూరు రాష్ట్రంలోని బెంగళూరులో జన్మించారు. ప్రస్తుతం ఇది కర్నాటక రాజధానిగా ఉంది. రజినీ అసలు పేరు శివాజీ రావు గైక్వాడ్. ఐదేళ్ల వయసులోనే రజినీకాంత్ తల్లి మరణించారు. బెంగళూరులోని ఆచార్య పాఠశాలలో ప్రాథమిక విద్యను ఆపై రామకృష్ణ మిషన్ ఆధ్వర్యంలోని వివేకానంద బాలక్ సంఘ్‌లో చదివారు. రజినీ మాతృభాష మరాఠి. మాతృభాష మరాఠీలో రజినీకాంత్ ఒక్క సినిమా కూడా చేయలేదు. ఇక సూపర్ స్టార్‌ అయ్యే క్రమంలో రజినీకాంత్ ఎన్నో ఆటుపోట్లను ఎదుర్కొన్నారు. సినీ పరిశ్రమలోకి రాకముందు రజినీకాంత్ కర్నాటక రాష్ట్ర రవాణా శాఖలో కండక్టర్‌గా పనిచేశారు. ఈ సమయంలోనే చాలా వేదికలపై నటిస్తూ క్రమంగా తనలోని నటనా ప్రావీణ్యంపై మరింత దృష్టిసారించారు.

బాలీవుడ్‌కు రజినీ పేరు పరిచయం అక్కర్లేదు. ఇక దక్షిణాదిన రజినీకి ఉన్న క్రేజే వేరు. దక్షిణాదిలో రజినీ కాంత్‌ను ఒక దేవుడిలా కొలుస్తారు ఇక్కడి అభిమానులు. అందుకే అతన్ని రజినీ సర్ అని పిలిచి గౌరవించుకుంటారు. దక్షిణాదిన రజినీకాంత్‌కు భారీగా అభిమానులు ఉన్నారు. తన సుదీర్ఘ సినీ ప్రయాణంలో ఎన్నో అవార్డులు, రివార్డులు, ఫిల్మ్ ఫేర్ ఉత్తమ నటుడు, తమిళనాడు రాష్ట్ర ప్రభుత్వ అవార్డులు, కలైమామణి అవార్డులు చెవలియర్ శివాజీ గణేశన్ అవార్డులతో పాటు కేంద్ర ప్రభుత్వం నుంచి పద్మ భూషణ్, పద్మ విభూషణ్ లాంటి పౌర పురస్కారాలు రజినీని వరించాయి.

తమిళనాడు రాజకీయాల్లో రజినీకాంత్ ప్రభావం చాలా ఎక్కువగానే ఉందని చెప్పాలి. రాజకీయ పార్టీని పెడుతున్నట్లు ప్రకటించిన రజినీ కాంత్, సొంతంగా గెలవగలిగే సత్తా కూడా ఉంది. గతంలో రజినీ రాజకీయ పార్టీ పెడతారంటూ ఎన్నో వార్తలు వచ్చినప్పటికీ... అవి కార్య రూపం దాల్చలేదు. తాజాగా రజినీ కాంత్ స్వయంగా పార్టీ పెడుతున్నట్లు ప్రకటించడంతో ఆయన అభిమానులు సంబరాలు చేసుకుంటున్నారు.