మాయావ‌తి

దేశంలోని తిరుగులేని రాజ‌కీయ నాయ‌కులంద‌రిలో చాలామంది ఎలాంటి రాజ‌కీయ నేప‌థ్యం లేకుండా పైకి వ‌చ్చిన‌వారే. అలాంటి వారిలో మాయావ‌తి ఒక‌రు. దేశంలోనే తొలి ద‌ళిత మ‌హిళా ముఖ్య‌మంత్రిగా ఆమె చ‌రిత్ర సృష్టించారు. ఉత్త‌ర్ ప్ర‌దేశ్ వంటి అతి పెద్ద రాష్ట్రానికి నాలుగుసార్లు ముఖ్య‌మంత్రిగా పనిచేశారు. 2012 అసెంబ్లీ ఎన్నిక‌ల‌లో పార్టీ ఘోర ప‌రాజ‌యం చ‌విచూడ‌టంతో ఆమె ప‌ద‌వి నుంచి వైదొలిగారు. ప్ర‌స్తుతం బీఎస్‌పీ జాతీయ అధ్య‌క్షురాలిగా ఉన్నారు. గ‌తంలో మాయావతి ఉపాధ్యాయురాలిగా ప‌ని చేశారు. బీఎస్‌పీ స్థాప‌కుడైన కాన్షీరాంతో ఏర్ప‌డిన ప‌రిచ‌యం కార‌ణంగా రాజ‌కీయాల‌లోకి వ‌చ్చారు. మాయావతిని రాజ‌కీయాల‌లోకి తీసుకొచ్చిన కాన్షీరాం 1995 లో త‌న నాయ‌క‌త్వాన్ని ఆమెకు అప్ప‌గించారు.

స‌మ‌ర్థ‌వంత‌మైన పాల‌న‌తోపాటు శాంతి భ‌ద్ర‌త‌ల‌ను అదుపులో పెట్ట‌డంతో ఉత్త‌మ ముఖ్యమంత్రిగా మాయావ‌తి ఆద‌ర‌ణ పొందారు. బ‌ల‌వంతంగా రాజీనామా చేయాల్సి రావ‌డంతో ముఖ్య‌మంత్రిగా ప‌ని చేసిన మొద‌టి, రెండో ద‌ఫా స‌మ‌యంలో ఆ ప‌ద‌విలో ఆమె కొన్ని నెలలు మాత్ర‌మే కొన‌సాగారు. మూడో ద‌ఫాలో ఒక ఏడాది పాటు ప‌నిచేశారు. నాలుగో సారి ముఖ్య‌మంత్రి అయిన‌ప్ప‌డే ఆమె పూర్తి కాలం ప‌ద‌విలో ఉన్నారు. నాలుగో సారి ముఖ్య‌మంత్రిగా ప‌ని చేసిన కాలంలో అంత‌కు మునుపు ములాయం సింగ్ ప్ర‌భుత్వం చేప‌ట్టిన పోలీసు నియామాక ప్ర‌క్రియ‌లో చోటు చేసుకున్న అక్ర‌మాల‌ను స‌రిదిద్దారు. 1989లో బిజ్నోర్ నియోజ‌క‌వ‌ర్గం నుంచి గెలిచి తొలిసారిగా ఆమె లోక్‌స‌భ‌లో అడుగు పెట్టారు. 1994లో ఆమె రాజ్య‌స‌భ‌కు ఎన్నిక‌య్యారు. 1998-2004 మ‌ధ్య కాలంలో అక్బ‌ర్‌పూర్ నియోజ‌క‌వ‌ర్గం నుంచి మూడు సార్లు లోక్‌స‌భ స‌భ్యురాలిగా మాయావతి సేవ‌లందించారు. 2014 సార్వ‌త్రిక ఎన్నిక‌ల‌లో బీజేపీ చేతిలో మాయావ‌తి పార్టీ ఘోర ఓట‌మిని చ‌వి చూసింది. ఆ ఎన్నిక‌ల్లో రాష్ట్రంలో క‌నీసం ఒక్క సీటును కూడా పార్టీ నిల‌బెట్టుకోలేక పోయింది. తాజా ప‌రిణామాల‌ను చూస్తుంటే పార్టీ మ‌ళ్లీ కోలుకొంటోంద‌ని ఆమె భావిస్తున్నారు. స‌మాజ్‌వాదీ పార్టీతో క‌లిసి కూట‌మిని ఏర్పాటు చేసిన‌ ఆమె అలీఘ‌ర్, మీర‌ట్ సీట్ల‌ను గెల‌వ‌డంతో క్ర‌మంగా క‌ష్టాలు వైదొలుగుతున్నాయ‌ని పార్టీ వ‌ర్గాలు భావిస్తున్నాయి.